TW Editorial | Thlatun 6, 2025

 

Cartoon ena hringnun ei hmang tan ve dier dier lai amanih, ABC ziek ei inchuk laiin amani einiah chi the in a um a. Nu le pa haiin an min awi in tum lai khawm a ni thei, mi ropui tak, thil ropui tak thaw dingin zirtirin ei um a.

 

Ei hung inthanglien pei a, hi thil hi ei hung inthang tung pui pei a. Ei suongtuonaa chun hlimna mi pe tu ding thil chu ei zuk ngairuot thei. Hmatieng beiseina lientak neiin hringnun ei khal pei a. Sienkhawm ei ring ang rawk a lo ni nawh. Rawl bang ei hang baw lem chu lung a zing.

 

|henkhat chu thil dang uksak lêk lovin an thiltumah an inbur nghet bur a. Hlawtling dinga inzirtir ei ni hrim a, amiruokchu hlawtlingna hi hril dan dang dang um a tih. Ei chanchin miin an ziek naah ei thilthaw ropui tak takhaiin bit vawng sien ei nuom. Lo bit thei vawng sienkhawm ei hlawtling tak tak chie am? Mihriem hin tlereu thil hi ei ngainaa. Thil tle hai ei hnawtnaa hin a tle lo hai, thil chîn a ei i ngaihai hlutna hi ei hmu thel nuom hle.

 

Chu ang tho chu a nih Pathien ei zuinaa khawm. Ropui taka intuokpui ei tum a. Tlangsanga hang hmu ei tum hlak. Tle rei ruoiah hmu ei tum a, amiruokchu, thil chîn tak tak, ei uksak lo haia khawm hin Pathien chu an lang zing a nih. Lungngaihai kuoma um an hawk a, taphai tappui tu, natna khuma zalhai kantu a nih. Khawvel ropuina le mawinaa hai nekin, a mawi lo le hmusituma hai hin a hmel ei hmu lem rawp.

 

Pathien hi a ropui a, amiruokchu khawvel ngaia ropuinahaia hin an lang ngai meu nawh. Ama chu tlawm taka bawng ina hung insieng, muolphotaka kraws a khai kanga um ei Pathien a nih. A ropui hle lai zingin an langna hai hi khawvel ngaia thil ropuihai a ni kher nawh. Mivar hai khawma lal inah an va zawnga chu an hlawsam a ni kha.