TW Editorial | Thlatun 13, 2025 (Ropuina a hung kir)

Ezekiel lekhabua chun, zawlnei chun Pathien ropuina in temple a maksan a hmu a (Eze10–11). Thil hmu inhawk um lo tak a nih. Israel thuawinawna le suolna leia tlung a ni lem si. A chenchil zing tu in a maksana, Pathien umpuina le ditsakna in a fe hmang san a nih. Kumzabi tamtak chu temple chu inthawina inhlannaa hmang ni zing sienkhawm, ropuina in a maksan tah. Amiruokchu, Pathienin a mihai a maksan sawng nawh.

Tumkau Ni in, ropuina a hung kir a nih. Sûm angin amanih, kangbohmang mei angin amanih a ni nawh. Sabengtungte chungah chuongin, Ropuina Lalpa chun Jerusalem a lut a, mipui pungkhawm haiin “Hosanna!” (Tuhin sandam rawh) tiin an khek a nih (Mat.21:9). Hi hi hrillawkna sukpuitlingna le Pathien thutiem sukpuitlingna a nih. Isu, thu taksaa hung inchang, ama chu a nih Pathien ropuina suklangna (John1:14). Khawpui chau a lut nawh a, temple khawm a lut nghe nghe a nih  (Mat. 21:12). Pathien ropuina in a maksan taa chu Pathien ropuina a hung kir.

Sienkhawm, Ezekiel hun lai ang bawkin, mi tamtak chun an lungril an la sukngar ta rawp a. Rev Thangngur-in, Hosanna rawl a danglam tah Hemde rawh tina in a lo ti angin, ni tlawmte hnungah Hosanna tia khek ri kha Hemde rawh tiin an chang a nih. Ezekiel hun lai ang bawkin, temple chu maksanin a um nâwk a nih. Pathien naupa in a maksan a nih (Mat23:38). Amiruokchu, Isu Krista zarin, temple thar le \ha lem indinin a um a nih: Kohran, Krista taksa, Pathien thlarauin a chenchil ta chu.

Pathien ropuina chu a hung kir a, einiah a cheng a nih. Tumkau ni hin ei Lalpa chu a hung ti chau ni loin, ei lungrilah hung lut thar sien, ei kawtkhar ei khar up tlat hai a lutna dingin hawng thar ei tiu. Ama chu lo lawm ei tiuva, tumkar le sawlhna hai le chau nilovin, simna leh, thuawina leh, ringumna in.