TW Editorial | Thlatau 30, 2025

 

Ei ram hi ei hang thlir a, indo chu hril lo, a sie ta em em. Kristien hai umna in ti si hin, suolin nasatakin a mi rûn zing a. Hmatieng thil ding ngaituo chang lem chu thawpik a um hle.

 

Indo lai ei ni leiin indona thu hin ei lungril a hluo bit hne hle a. A ni ding hrim a nih. Chulai zing chun ei insunghai hi ei ngaipawimaw thar nuom a um hle. Nu le pa hi tum an pawimaw lem ti inla, an pawimaw dan chu inang naw nih. Mawphurna chi tum tum pek an ni tlat leiin. Chulaizing chun, vawituk hin pa tieng hi hang thlur bik deu inla ei nuom a nih.

 

Eini zohnathlak haiin le khawvelin ei entawn tak chu thlang (west) ram khu a nih. Amiruokchu, thlang ram khawm a pawrche ta em em. US bika lem chu midumhai hi 13% vel chau an ni a, chulaia chun US a suolna thil tlung hai khu100 ah 50 chuong hi mi dum hai kuthnung a nih. Thomas Sowell chun, a san lientak chu mi dum insungah Pa an um naw lei a nih a tih.

 

Ei bible a khawm pa mawphurna hi hmun tamtakah an ziek a. Pa chu insung enkaitu ding, thlarau le taksaa chawmtu ding, thuoitu le insung ban a nih. Nuhai umhai sienkhawm, pa le nu chan changa nauhai siempuitling tamtak eini lai lem chu ei um. Amiruokchu, pa umna le umnawna hi a tlangpui thuah a dang a nih.

 

Tu tieng hin pahai hin insunga ei mawphurna hi ei inthla zal deu deu taa. Ei mawphurna hi ngaipawimaw thar ei tiu. Ram le hnam, khawtlang le insung siemthat ei nuom a ni chun ei insunga hai tan thar ei tiu.

 

Ei ramin Pa tha, pa indik, pa huoisen, Pathien chel tlat tu le a insung Pathien tienga thuoitu a nih a mamaw chu. Pa haiin kohran bel ei tiu, Pathien rawnin Pathien bie hlak ei tiu. Pathien hnai hi a tha si a...!