TW Editorial | Thlatun 20, 2025

Easter Sunday hi niser satlie mei mei a ni nawh. Ei ringna suk kimtu, ei ta dinga ni pawimaw em em a nih. Thlan a ruok a. Isu Krista a thonawk a. Isu Krista thonawkna leiin ei ringna hi a bûl tui naw a, beiseina hring a mi pêk lem a nih.

Kraws a khan lunginsietna le hmangaina’n hnena a chang a. Thonawknaa hin, thina chu a tlawm tah. Thawnthu amanih tienami mei mei a ni nawh. A tak ngeia thil tlung, thil ropui le Pathien thilthaw a nih. Tirko Paula in a lo ziek angin, “Krista chu keithoa a um si naw chun, kan thu hril hi iengkhawm ni naw ni a, in awi khawm iengkhawm ni naw nih.” Amiruokchu, Krista chu keithoiin a um a, chu zara chun beiseina hring ei nei a nih.

Suolna, titna le lungngaina in a bawm vel khawvela hin, Easter Sunday hin thu thatak a hril a nih. Isu’n a hne zo tah. Thlan thima inthawka keitho tu ngei chu eini ringtuhaia hin a chêng a. Isu Krista thilthaw lei chauvin, ngaidamna, sukdanglam le chatuona hringna ei chang a nih. Ei thawsuok thei um der lo a nih.

Krista in a min tlanhai, van khuo le tuia a mi siemhai ei ni leiin, Isu Krista chu Lal a nih, a mi sandamtu le la hung nawk ding chu a nih ti hi nunpuiin ama angna tiengah nitin inthanglien ei tiu. Thlan hi ei tawpna a ni nawh. Ei hringna intanna lem a nih.

Vawisuna Easter Sunday hmangtuhai po po, ei lungrilhai siemtharin um sien, ei ringna sukhratin um sien, hi khawvel inthim taka hin huoisenna thar leh Krista var var suokpui ei tiu.

Isu Krista chu a tho nawk tah. A hril ang ngeiin. Chu zara chun, hmatieng beisei a ditum tak ei nei a nih. Tho nawkna ropui tak ei hmangna a hin ei lungrila hai Isu Krista ei thi aia thi a tho nawk ta chu hung inlar thar ngei raw sen!