Thalai Weekly Pdf chungchang

Pathienni tuk zata insuo Thalai Weekly chanchinbu hi kum 15 hmel a hmu mek a. Pathien zar le tlawmngai hai zarin, tulai digital khawvelah lekhapuon a suok ngei chanchinbu kum 15 tal tawp ei lan suo thei zing hi a ropuiin ei lawm tak zet a. Thahnemngai taka latu, kohran mipui chau ni lo khawtlang mipui hai chunga khawm ei lawm bek bek.

Khawvel hmasawnna le khawsak relna ding ngaituoin mihriem ei buoi pei a, sin thaw le inchukna leia khawsunga um remchang ta lo khawm tam tak ei um tah. Chuong hai ta ding bik chun chanchinbu ei siem Pathienni tuka Pdf a ei insuo hi a hlu zuol bik niin ei hriet.

Hi hma chen kha ei KTP group ah a thlawnin Pathienni tuk zat Pdf ei kapkai hlak a, puotieng a um le thahnemngai haia inthawk thurawn ei dawng zeu zeu angin enkawltu InFo meeting chun tuta inthawk chu online tieng khawm insawnlut in subscription hai tha takin thaw ta inla ti chu riruongna thar a hung siem a nih.

Hi hmalakna hi Thalai Weekly thangpuina ni nghalin puotienga um khawsung mi ei kohran chau ni lo hai khawma khawtlang chanchin hai an umhmun a an lo hriet ve theina ding ngaituoa buotsai a nih.

Tuta inthawk chu KTP group ah Pdf hi kapkai ni ta naw nih. Pdf subscribe ding hin inphutluina chu a um nawh, nisienkhawm, Thalai Weekly hmingin ngaina taka la ding ruok chun ei in fiel a nih.