TW Editorial | Thlatau 8, 2025

 

|awng a hring zingna dinga pawimaw em em pakhat chu hmang el niloin lekhabua ziek nei tam hi a nih. Hmar hai hin lekhabu ngainatna ei tlasam hle ti chu ziektu tamtak lo beidawngna a ni rawp hlak. Lekhabu thar hawngna hunsera nekin ramdanga inthawk thuomhnaw hlui hung lût (second hand) hawngna hmun ah mipui an tam lem rawp hlak.

 

Kumkhata hin lekhabu thar pakhat a suok naw chang khawm ei nei zeu zeu hlak a. Kumtina lekhabu suok ei nei thei sun chu Kohranin hrilfiebu le kum thupui bu a siem hai hi a ni el âwm. Thlasiet a um hle! Asanchu lekhaziektuhai inrimna khan ngaihlut a hlaw naw a, lungrila hrietna var khâwlkhâwm nêkin phîngpuia khâwlkhâwm ding le, sil le bil a chuong a liema ngaihlu lem hnam ei ni tlat annâwm. Ei unau Duhlien tawng hmang hai chun lekhabu hi an sut tlut tlut a, lekhabu tha tak tak le tha lêm lo khawm kumtin an suk suok hmu ding a um hlak. Lekhabu an ziek el bâka khawvêl ngaia lekhabû tha hai an tawng ngeiin an inlet hlak a. An tawng humhalna sin ropuitak an thaw chu a ni zing el. Hieng ang chîng dân tha dâm hi en tawn thei inla nuom a um ngawt el.

 

Ei hnam ei hmangaina le invawina leiin hnam ta dingin thil ropuitak ei thaw thei kher naw el thei. Ei insûnga tawng ngainatna hartharna tlung thar sien, ei nau le te le tû le te hai, suon hung thar pei hai khawma an zâwm thei dingin hnam nunzie ei lo tû nghet a ni chun hnam hmâkhuo ngaituhai lai ei hming hril rîk rawp ni hlak a tih.

 

A tawp taka chun, sâp tawng hi thiemnaw ding le ngaisak naw ding ei ti naw a. Ei inchukthiem tum ding a nih. Amiruokchu, mî in a piengpui nû tawng thiem tum si loa sâp tawng chau a thiem hlur a ni chun ama le a thlahai chu mi lungsietum tak a nih. Chu mî chu a hnam tawng thattu hai laia tiem ve ni ngei a tih. Chuleiin, hieng anga ei fe zing a, kum tamtak liem hnunga ei tawngin khawvel rama hin hmun chîte bêk khawm a chang ta naw a ni chun; thangthar haiin, tu suksuol am a ni a?

 

Ei tawng hi, TU IN AM A THAT A? la hung ti ngei an tih