TW Editorial | Thlatau 16, 2025

 

Tlangmi Zohnathlak hai lai chu ei thenum Mizoram hai chau sawh mani a ram ro inrelna Assembly nei niin tuchena chu ei hriet. An vangnei a, an hamtha, state pakhat an ni tawng hmangna “kan ram” ti ding an nei a nih.

 

Vangnei hle hai sienkhawm, an vangneina a sawn an thalai tam tak saw a fenhleng nasa taluoa an hmakhuo ding ngaituona sawh an invawi bek naw niin an lang. Thil dang dang chu thuhran ah sie inla, an ram ro inrelna Assembly ro hai sawh invawi a ngaituona hi a ri an leng nasa naw leiin ram hmangai, thanghlui deu le khawvel thlir zau deu hai chu an thaw a pik deu a nih. Ram ro inrelna, ram hmakhuo ngaituona nekin thu tak tling lo, chai tham le ngaituo tham ni loa sawn an intalbuoi nasa a nih.

 

Chu ang deu chun ei ni Hmar tawng hmang thangthar hai khawm hi, a pawimaw thil ngaituona nekin thu tling lo chai le ngaituona hin ei lungril le ei thalai hai an insuk buoi nasa lem amanih aw ti dingin a um hlak. Ei ni vawng kher naw a chu ei lungril thlek nuomna zawng hai hi, inthanglien pui ding taluo a tam nawh.

 

Tukhawm hin ei hmabak ah Hmar Inpui GHQ inthlang ding thla tawpa dingin Calendar a inchuon a ni tah. A hmun le a ni hai khawm sukfel vawng a ni tah. Hnam anga ei inenkawlna, ro ei inrelna Hmar Inpui hmakhuo hi kohran le khawtlang el chau ni loin mimawl khawma a dawnsak pei hi ei um naw a ni deu tak.

 

Hnam thu a ni pha ei hrilhnuol a, mi tha le mi fel haiin ei dem a. Tawngtaina a hrie pei khawm ei um meu dal di’m chu. Social Media a dam, dawrkawn a dam, hohlimna hmun haiah hmatienga ngirhmun thalem a ei chuongkai thei dan ding, hnam inrelbawlna thil hai hi ngaituona a thar a ei seng chu a pawimaw hlak de aw...!