Thalai Chawlkar 2025 tumtiek; Matthai Group Overall Champion

Thlaphur ni 19, 2025 zan khan Thalai Chawlkar 2025 chu Upa Ramhlunsangin a hawng zoin Chawlkar inkhawmna hun hmang tan a nih. Khawsungah lusunna a um leiin Nilaini zana mi riruong ta sa program po hmang thei loin a uma, a dang po chu induong ang taka hmang a nih.

Inkhawm zat hin Group a inthawk hlapawl le malzai ngaithlak hlak a nia. Choreography khawm mawi tak el suklang a ni bawk. Inkhawm tin zat biekin tuolah thingpui le bei refreshment buotsai hlak a ni bawk a nih.

Hriltlangna hi kum dang ang lawm lawmin a hril ei um nawa chu, thei ang anga hriltlangna hun hmang a ni a. Hun changtu ding hai remchangnawna leia sukdik thei lo tukhawm an um nawa, program a inchuona um haiin an hun an hluobit thei seng a nih.

Thalai Chawlkar hmang dan ding le inzawma kohran pumpui thalaiin an duong ang hrimin, Sielmat Unit chun khawsunga lampui tha naw (potholes) hai hrukbitna dingin tangka thei ang anga member sunga khawnin lam inkhur hai hruk a nih. Hi taka ding hin puotieng le kohran member dang khawtlang ta dinga thahnemngai tak tak an thang tawl. Chubaka chun, Canaan Veng pansukna laia lamkawina takak khawtlang ta dinga mi inphal pakhatin a thawlawm, lirthei khal hai ta dinga tangkai em em Convex Mirror chu Inrinni tuk khan inngir a ni bawk.

Chun, kohran inkhawmnaa hlasakna kawnga pawimaw em em el Kristien hlabu chu, chawlkar hmang le inzawmin thalai member sunga inthawkhawmin kohranpui kuomah KHB 40 zet el chu Pathienni zan khan inhlan a nih.

Inrinni khan umni khamin insukhlimna chi dang dang hmang a nia. Zingkar boruok zangkhai takin um sienkhawm, sun le chawhnung tieng deuah van ruotui malsawmna a tla leiin inkhel item hai a chawkbuoi meta chu KTP member hai inhawi an ti tlang a, raw sur do leia damnaw le taksa chau an um pha hriet ding a um nawh. Zan inkhawm zo zan thenkhatah, Sepaktakraw inkhel a nia, nuhmei shotput buotsai a ni bawk.

Inrinni suna inkhel le khawtlang lampui hai hrukbit phuor a ni hnungin zantieng hunah Chawlkar ruoi inhnik tak el the a nih. Thalai Chawlkar inkhawm le inkhel sung hin InFo team haiin media - video le thlalak coverage an mi thaw pek vawng a nih.

Thalai Chawlkar Recording Secretary in Chawlkar le inzawma record a siem thenkhat a hnuoia ang hin ei hung suklang:

Pathienni le lusun leia inkhawm naw zan tiemsa loin chawlkar khat sunga inkhawm zat chu zan 5 a ni a. Zantina inkhawm chawkruolin an khawm po po mi 99 le thalai mi 83 inkhawm zie ang a nih.

Chawlkar sung inkhawm le inkhelna chi dang dang a point hmu zat belkhawm hnungin Matthai groupin point 3380 hmuin Overall  Champion an ni a, Marka in 2960 hmuin Luka in 2640 an hmu ve.

Best High Jumper & People's Choice Award chu inchawm hrat Tv. Leadeth kuomah special category a inhlan a nih.

Pathienni zan thuhril zoin KTP Anthem sak a ni a, Rev. Lalrohlu in Thalai Chawlkar kharin Bendiction a hril. Thalai Chawlkar 2026 ah kim taka inhmu tlang nawk seng dingin aw...