Mal Lam 2025 | Nunghak haiin phuba an lak

Thlatun ni 29, 2025 zan khan ICI Gospel Centenary Guest House, Sielmat ah Independent Kohran, Sielmat Kristien Thalai Pawl chun a ṭum hnina dingin Mal Lam 2025 a buotsai. Nk. Christina Zarzomawi Mal Lam 2025 thiem tak nina hauin, tangka le certificate inhlan a nih.

Mal Lam hi KTP sunga group inruolsiekna a ni a, saptawng a Spelling Bee ei en hlak hai ang kha a nih. Hun hmangna a hin Tuiṭhaphai Presbytery KṬP Chairman Pu Lalnunmawi Zote le Nk. Zokhumi, TPKṬP Fin. Secy hai chu khuolṭha in an ṭhang.

Mal Lam hi group point a tiem a ni a, group a inthawk mi a tam tiengah 10 chen ṭhang theia induong a nih. Mal Lam a group aiaw a ṭhang an ṭhahnem hle.

KTP Group hi Diaspora hai ṭhangin group pali a ṭhe a ni a. Veng ah group pathum umin, group pathum member hai chun an group aiawtu ding inthlang dawkin Mal Lam inruolsiekna a hin an ṭhang tawl a nih.

Kum 2022 Thlado khan KṬP Diamond Jubilee lawmna ding le inzawmin Mal Lam hi buotsai a lo ni ta a, hi tum hin vel thum/zan thum a buotsai a ni a. Tuta ṭum ruok chu zankhat a zofel nghal a nih.

2022 kum khan Mal Lam a thiem tak nina chu tlangval tieng Enoch Peter, Secretary ni lai mekin a dawng a. Mal Lam 2025 hin nunghak haiin phuba lain Nk. Christina Zarzomawiin a thiem tak nina a hung lak a. Tv. Immanuel Tuolte le Tv. Matthew Amo haiin a thiem dawttu a pahnina le a pathumna an lak. Lawmmanin tangka a thiem tak indawtin ₹ 1,500, ₹ 1,000 le ₹ 7,00 le certificate inhlan an nih.

Hi Mal Lam hi Hmar ṭawng a buotsai hlak a ni a, KTP member hai insukhlimna malama Hmar ṭawng tieng a hrietna suk belsa a ni theina dinga hieng ang inruolsiekna hi buotsai a ni a. Hun hmanga um hi InFo haiin Live in ṭha takin an mi suk suok pek bawk.