Thaw ding, thaw ding… a va tam ngei

Thaw ding, thaw ding... a va tam ngei de aw. Mani insung khawsak ngaituo a tul, incheina ngaituo a tul, ruol le pai ngaituo a ngai, kohran thilah thang a pawimaw bawk. Chuhai po po balance thiem a va ngai nawk zuol de. Khing khatah thaw rak, khingtieng thaw nawk si lo hi thil um thei el ni lo, thil um zing zing a nih. Hi le hi ning a tih Sam ziektu'n "Kan damlai nihai tiem dan min chuktir la, varna lungril kan nei pha hielna dingin" a lo ti kha.
 

Thalai lem chu lekha inchuk le tiem, insunga thaw ding thaw, ruolhai le inpawl, kohrana inhmang... a va tam de aw. A tam ei ti maw? A tam ei ti a ni chun ei hriet naw taluo lei ning a tih. Thalai hun hi ei hrat lai tak, thaw ding ei nei tlawm lai tak, lungril sawlna ding ei nei tlawm lai a ni lem a nih. Thalai hun zo a chu harsatna a thuo thuoin a hung um lem a nih. Chuleichun a nih vanglai nihai hlut zie Bible a khawm an ziek ei hmu ei hmu hi.

Vanglai ni hi ei hrat lai a nih a, Pathienin thil ei thawna hun dinga a mi pek lieu lieu a nih. Pathien kuomah hun le thaw ding ei neihai balance thiemna ding le ama rawngbawlnaa bahla der loa ei thaw sunzawm pei theina ding hni zing pumin thaboa um mei mei loin Pathien mi pek huntha hi iengtin am hmang tangkai ei ta ti hi ngaituo lem ei tiu.
 
Pathienin mani mimal ta ding chau thaw dingin mi ti naw nih. Ama ta dinga sin ei thawna hun ding khawm mi pe sang ngei ngei a tih. Chu chu uksak loa ama rawngbawlna, kohran thilah ei thang ngai naw a ni chun Pathien hun mi pek ei inruk hmang a ni thei hiel el naw ding maw? Ama ta dinga ei hun ei pek a ni chun thil dang ei thawna ding hun el khelah thiemna le varna khawm mi pe sa ngei ngei a tih.