Ṭhalai chawlkar 2024 tluong taka hmang zo

Independent kohran, Kristien Ṭhalai Pawl in kum 2002 a inthawka a lo hmang ṭan tah Ṭhalai puolbik lieu a chawlkar khat hun sung Pathien thu le hla, taksa tienga insawizawina hun Ṭhalai Chawlkar (Ṭhalai Week) 2024 chu Thlaphur 20-26 inkar sung khan Sielmat Roberts Jubilee Chapel a hmang a ni a. Inkhel le insukhlimna hun hai hi tuolzawl le Sielmat khelzawl a hmang a nih.

Ṭhalai Chawlkar hi biel pumpuiin a ruola hmang hlak a ni a. Tukum thupui “Khuo le tui ṭha” ti hmang niin zan 7 sung hi thu hi ngaithlak a nih.

Rev. Dr. James R. Ruolngul, Rev. Rambuotsai Tusing, Pastor James Lawrence Darngawn, Rev. Joe Sanghmingthang, Tv. Andrew Lalnghillo, Pastor Johny Laldinthar F. Tusing le Pro Pastor Samuel Lalhuopzau Khawbung haiin chawlkar khat hun sung thupui hmangin thuhrilna hun an hmang a. Zantin thuhril zoin hriltlangna hun hmang niin inkhawm ṭin hunah, thingpui inhnik tak le bei kiltlang hlak a nih. Vadung inthiel > Vadung inthiel Thalai YouTube > Vadung inthiel

Ṭhalai chawlkar hmang dan ding a ruongam induong a ni danin, chawlkar hmang hun sung hin khawtlang le hnam thil a manih tlawmngaina (voluntary) sin ṭum khat bek thaw hlak nisien ti a ni angin, chawlkar hmang a ni hma met Thlaphur 18, 2024 khan Sielmat le Bijang inrina Leilak hnuoia vadung a hmunhnawk pawrche tak el, tamtak dehawn a um chu Ṭhalai Pawl hming a inthiel a nih.

Ningani zan inkhawm ṭin khan inkhel ṭan a ni a, Sepaktakraw pasal buotsai niin a zinga zan inkhawm ṭin ah sunzawm a ni bakah nuhmei hai ṭhungna inchu inkhelna buotsai a ni bawk.

Inrinni zingkar marathon inruolsiek a ni a, Tv hai Andrew, James Lalhmangai (Khawzawl) le Gideon Sellate haiin a pakhatna, pahnina le pathumna an lak a. Nunghak tieng Lalringmawi, Faith Roneihlu le Vanlalhmangai haiin a pakhatna a inthawk a pathumna an lak. Zing bu fak khawpin inkhelna chi dang dang sunzawm nawk a ni a. Hlensiek ah an sang tak Tv. Gideon (freestyle) in Feet 5 a zo a, a pahnina Christopher V. Hmar le Calvin Infimate haiin feet 4.10 hlenin a pathumna Joseph Ṭhiek, Lalropek, Mark Nungate le Ronald Kom haiin feet 4.9 an hlen ve a nih. Inkhelna thlalak hai > Chawlkar inkhel

Inchawm hrat (long jump) a pakhatna Tv. Calvin Infimate in feet 15.1 an chawm phak a, a pahnina Andrew in feet 14.11 le a pathumna Stephen Lalṭhapui in feet 14.8 an chawm phak a nih.

Sielmat khelzawl ah metre 100 intlansiek niin tlangval hai Christopher V. Hmar, Mark Nungate le Gideon Biete haiin a pakhatna a inthawk a pathumna an tlan dawk. Zantieng inkhel zo vawng a ni hnungin ṭhalai member fekhawm hai po po thlalakna hun hmang a ni a, chu zo chun Upa Ramhlunsang in ruoi inhlanin belpui sa inhnik tak el kiltlang a nih.

Ṭhalai Chawlkar 2024 inkhawm, hriltlang, inkhel le kawng iengkim a hmalakna a mawphurtu haiin group thaw ṭha tak an lo inchik angin Alpha group haiin “Overall champion” trophy an dawng a, Omega, Logos le Agape in an zui a nih.

Chawlkar hmang dan ding ruongam induong dan el bakah tukum thupuiah “Khuo le tui ṭha” ti a ni ang hrimin, Tuiṭhaphai biel sunga ei hriet thei chin unit dang dang hieng Saikot Hmar - Rengkai - Ngurte (Dist Hospital a thisen pek), Lamka (Dist Hospital inthiel, mi harsa ṭhangpuina pek), Hmarveng - Khawmawi (khawsung inthiel) hai hi suk puitling a ni a. Hriet ṭhel khawm um thei a ni a, hriet thei chin hai inchuon a nih.

KṬP Anthem sakin Rev. J. Thanglur in benediction in Ṭhalai Chawlkar 2024 a khar. 2025 Ṭhalai Chawlkar ah hriselna ṭha le inhmu nawk seng tum ei tiu, chu hma po chu ei theitawpin KṬP pei ei tiu.