Header Ads

Header ADS

Ei member Chris le mi 2 Missionary dinga tir suok

Independent Kohran, Mission Department hnuoia rawngbawltu dinga lak thar ei ṭhalai member Christopher Lalnghaklien (Nafra, Arunachal Pradesh posting) le Presbytery dang inthawk mi pahni Mr. Lalkozuol, Cachar (Hichacherra, Tripura posting) le Mr. Lalbiekhlun Hmar, Jiribam (Bhatgaon, North India posting) hai tir suokna kohran hunser chu Pathienni (Thlatun 21, 2024) chawhnung dar 1:30 in Rengkai biekin a hmang a nih.


Missionary dinga lak thar a um mi pathum hai hin Thlatun 8-19, 2024 sung khan Sielmat Bible College ah “Short course Missionary training” an lo fethleng tah. Introduction of new Missionaries & Handing over Appointment Letter Rev. J. Thanglur - Secretary, Missions Dept. ICI in a hmang a; Missionary Commissioning Service & Dedication of Missionaries Upa. Lalzarlien Darngawn Chairman, Mission Board le Exhortation Message Rev. Zathangsing Zate Executive Director, MRH&RC, Muolvaiphei haiin an hmang.



Tuta mi pathum Missionary dinga tir suok a um mek hai hi Independent Kohran in kum 2019 a Missionary pahni a tir suok zoa kum 5 na a tir suok nawkna chau a nih.



Tir suokna hunser hmangna a hin ICI Central Choir, Sielmat le Rengkai Ṭhalai haiin inpakna hlapawl an inhlan.


Ei member Christopher hi Ṭhalai Diamond Jubilee (2022) kum khan Secretary a ni a, tuhin Ṭhalai Weekly Editor mawphurna a chel mek. Ṭhalai Pawl inṭhuoi dan dungzuiin Thangsuopuon insil tir niin thuziek mawi inhlan a ni bawk.



Ei ṭhalai bik a dingin kohran thawktu naran el ni loa Krista pasalṭha Missionary ni dinga member inpe thar ei hang um nawk el hi, a ropuiin lawm a um hle a. Pathien kuoma lawmthu hrilin, ṭhalai member hai rawngbawna a ei luong suok sunzawm pei theina dingin ṭawngṭai bawk ei tiu. Tuhin Mission field a rawngbawltu pumhlum active member 5 ei neina ding a ni tah.

No comments

Powered by Blogger.