Ṭhalai inkhawmpui lien vawi 40-na hmang

“Thi chena ringum” ti thupuia hmangin Independent kohran, Kristien Ṭhalai Pawl inkhawmpui lien vawi 40-na chu Thlaṭau 8-10, 2024 inkar sung khan Muolhoi (Assam Hills Presbytery) a hmang a nih.

Inkhawmpui lien hi Zirtawp zan mipui inkhawm a ṭan a ni a, Inrinni sun inkhawmpui rorel le inthlang, Inrinni zan, Pathienni sun le zan inkhawmna hun a hmang a nih.

Inrinni in kum 2024-2026 sunga Central Kristien Ṭhalai Pawl hotu ding inthlang nghal a ni a. Chairman dingin Evangelist at Large ni lai zing Rev. Lalrohlu thlang a ni a, Vice Chairman Upa VL Renga Hriler, Secretary dingin Pu Ebenezar R Sinate, Asst. Secretary Pu Dr. Solomon V Faihriem, Finance Secretary Nk. Merina Buongpui le Treasurer dingin Pu Joyful L. Ṭhiek hai thlang an nih.

Executive Committee member dingin Upa Ramhlunsang, Pu David Taite, Rev. Ramropui Ṭhiek le Pu Ramhmangai Khawbung hai thlang an nih.

Manipur buoina leiin hlapawlpui le malzai inruolsiekna Buonglienkung Award le Rev. Thangngur Award hai sukchawl hri a ni a. Hla Ruoi hmang niin thawlawm lakkhawm a um hai Manipur buoina a harsatna tuok hai ta dingin inhlan ning a tih.

Rev Dr. JL Songate, Rev. Dr. V. Lalnghakthang, Rev. Evan John le Upa Ramhlunsang haiin inkhawmpui hun sung hin Pathien thuhrilna hun an hmang tawl.

Inkhawmpui report data ei hmu angin Presbytery 15 ei um mek a, City Church 2, Mission Field 7, Unit 220+, member 8486 niin Muolhoi a inkhawmpui fe inzieklut po mi 1248 an nih.