Tuiṭhaphai Presbytery inkhawmpui 76-na hmang

“Isu Krista hung nawkna” thupuia hmang, Sielmat a innghat Tuiṭhaphai Presbytery inkhawmpui vawi 76-na chu Thlaphal 10-12, 2023 sung khan hmang niin vawizan khan a lo ṭumṭiek tah. Inkhawmpui hi Zirtawpni le Inrinni sun hai rorelna hun a hmang a ni a, Pathienni in mipui inkhawmna hun hmang a nih.

Kohran Upa thlang thar Vanlalbel (Hmarveng), Romell Wilson Varte (Gilgal), Rosanglien (Vanchengphai) le Laldatlien Tusing (Lamka) hai Ordination pek an ni a. Manipur a hnam indona leia mani umna hmun maksan tah Kohran Upa hai chu tuta an um mekna kohran haiin an Upa nina pawm dinga hnina an siem angin Rengkai ah Upa Sumtho, Upa J L. Malsawm le Upa Lalhriatkima, Muolvaiphei ah Upa Lalthangmawi le Hebron ah Upa Lalhrat hai pawm pek an nih.

Inthlang kum a ni le inzawmin 2024-26 sunga Presbytery hotu ding hai Inrinni khan thlang a ni a. Presbytery Standing Committee Chairman dingin Rev. SK Songate, Vice Chairman - Rev. BL Sandam; Presbytery Standing Committee Members - Upa David L Lungṭau, Upa Lalnuntluong Faiheng, Upa Dr. Lalnghaklien, Upa Lalruot Ralsun, Upa Dr. HL Liensang, Upa H. T. Vela, Upa Haulienhlu, Pu Laldatlien Tusing; Executive Council member Upa David L. Lungṭau, Upa Lalnuntluong Faiheng, Upa Lalruot Ralsun, Upa Dr. Lalnghaklien, Upa Dr. HL. Liensang, Upa Haulienhlu hai an nih.

Inkhawmpui hun sung hin Upa Lalzarlien Darngawn, Rev. B.L Sandam, Pastor Zothanghrim haiin Pathien thu tak an hril a. Ordination service-ah Minister Pastor Robert Vanlallien in hun a hmang.

Rorel palai mi 207 fekhawmin ni 2 sung ro rel a ni a. Inrinni le Pathienni hin bawng pumkhat ve ve thatin ruoi ṭhe a ni a. Ram buoi kara inkhawm le rorel hai huoihawt a ni leiin inkhawm hun thuah ṭum dang inkhawmpui le inang nawna neu neu a um. Pathienni hin mi 600 neka tamin taksa ruoi an kîl a nih.