Ṭhalai Hapta 2022 ṭumṭiek; Overall lawmman latu Philippi group

"Sik dingin a hmin"(Johan 4:35) thupuia hmanga May 23, 2022 a Ṭhalai Week hmang ṭan a um chu vawizan (Inrinni zan) khan tuolsung program bik a dingin a lo ṭumṭiek tah. Zantin inkhawmna hunser hmang a ni a, zantieng le zan inkhawm ṭin hun ah taksa insawizawina in inruolsiekna chi dang dang huoihawt hlak a ni a. Inkhawm dan tlangpui ah - hun vawngtu, ṭantu, special item, thuhriltu le hriltlangna hun hmangin inkhawm ṭin zatin thingpui dawn tlang niin akarchang chu bei khawm a um sa hlak a. Inrinni - vawisun khan umni khamin ṭhalai inruolsiekna chi dang dang el insuk hlimna ni fawmin hun hmang a ni a, zantieng hmangaina ruoi kiltlang nghal a nih.

Ṭhalai Week hi kum khat sunga ṭhalai hunpui a ni leiin member haiin nasataka ei tung le ei phur a ni ang hrimin taksa le thlarau tieng ah theitawp suo a ṭhang lak a ni a. Week sung hin Rev. Alan L Ṭhiek, Pu Ebenezar Sinate, Upa Ramhlunsang, Tv. Elvis Buonhmingthang, Pu LD (James Lowrence) le Rev. Dr. James R Ruolngul haiin Pathien thu an hril a nih.

Inruolsiekna chi dang dang el - football, volley ball, sepaktakraw, hmai tuom a ball pet, hrui inkei, inchawm hlat le inchawm insang, human tunnel, poison ball, tarpaulin a inhlieu, tlan inel, kut inbuon haia inruolsiekna thaw a ni a. Zan inkhawm hun a hriltlangna hun ah group member hai hriltlangna a ṭhang hai group point a belsa pei a ni bawk.

Ṭhalai inkhawm zan 6 sunga Ṭhalai khat chau inkhawm tam zan tak chu member 104 niin tuola mi 1 um le unau kohran danga inlawi pahni tiemsain inkhawm 107 ei kai a. A tlangpuiin 100 ei kai naw zan khawm 90 bawr vel ei ni hlak. Inruolsiekna thienghlim a ṭhalai hai theitawp a ei inel kha a mawiin a hmu an hawi a.

Tam takin taksa el chau ni loin Pathien thu ngaituona hunin an hmang ti an lang a, Ṭhalai Week hi hlawk hle a hriet le ngai a nih.

Inruolsiekna a mi ni lo lawmman chi dang dang sem a um hai:

1. A foul tak - Tv. Ramfangzaua

2. WOW! Goal of the Week - Tv. Reuben Biete

3. Football inkhel laia complaint hrat tak : Tv. Gideon Biete

4. KṬP Week fair play award : Galati

5. A chier pei tak : Ephesi group

6. Nungchang ṭha tak : Tv. Lalramsung

7. Most improved player : Inhan Tuozading

8. Player upa tak : Tv. Paul Nathan

Mimal inruolsiekna a lawmman latu hriet thei po hai:

PASAL KUT INBUON

A pakhatna : Tv. Zosanglien Faihriem

A pahnina : Tv. Gideon Biete

A pathumna : Tv. Lalramvul

NUHMEI

A pakhatna : Nk. Meinir Zorengpui

A pahnina : Nk. Vasty Lalengvar

A pathumna : Nk. Abigail

Inrinni tuk dar 6 le ti khan Marathon tlan a ni bawk a, lawmman dawngtu hai po a hnuoia angin:

PASAL

A pakhatna : Tv. Andrew Robul

A pahnina : Tv. Lalramsung

A pathumna : Tv. hai Gideon Biete le Manu Tuolte

NUHMEI

A pakhatna : Nk. Melody Ramthienghlim

A pahnina : Nk. Vanlalhmangai 

A pathumna : Nk. Faith Roneihlu

Mimal a inruolsiekna hai khawm hi group point a bel lut vawng a ni a. Point hmu a um po po a renga belkhawm a ni hnungin group 4 khawsung a um hai laiah Philippi in point 3,000 char hmuin Ṭhalai Week 2022 Overall Lawmman latu a ṭhangin Trophy an dawm a. Kolossa, Ehpesi le Galati haiin 2840, 2475 le 2085 hmuin a pahnina, a pathum le a palina ngirhmun an hluo tawl a nih.

Kum danga a tawp tak ni Pathienni hmang hlaka um chu tukum ruok chu intuokkhawm angin Centre pathum a ṭhe a ni a. Ei unit chu Saidan Centre ah a tawp zan tak hi hmang ning a ta. Ei unit ti lo Tuiring, Langza, Thingchawm,. Saidan, Khawmawi, Bethel, Hmarveng, Sielmat, Lamka le Rengkai Unit hai fekhawm ning a ta. Pathien thu hriltu ding chu Rev. Alan L Ṭhiek ning a tih.

Ṭhalai Week sung inruolsiekna tam tak el a um a, ṭhang na taluo leia inselna, infiemna hai am a nih inhrietthiem naw khawp hiel le thil dang dang a ngaidan inang naw leia lung inhmu lo dam um thei a ni a. Hieng hai po po hi Ṭhalai Week a tawp le inruola intawp tir a, Krista lungril put a hlim tlang taka ṭhalai hai rawng bawl tlang nawk seng dingin ei infiel a.

Ṭhalai World Cup 2022 a lo tawp nawk ta a, Pathienin mi umpui sien lukim 2023 May thla ah hlim tlang taka ei intuokkhawm nawk seng theina dingin Pathien kuoma ei ṭawngṭaina ah belsa hlak ei tiu.

Hlimthla ṭhenkhat: