Ṭhalai inkhawm ṭan; Jan 22 ah hming zieklut ṭan ding

Liemtah January 15, 2021 zan khan tukum a Ṭhalai inkhawm vawikhatna le hmasatakna dingin inkhawm ṭan a lo ni tah. Hi zan hi Ṭhalai subject kum liemtah a mi inchuk hman lo a um inchuk sunzawm niin Pu Derick L Khawbung, SDO Vangai in "Ṭhalai le Inchuklai" lesson ama ziek ngei chu hrilna hun a hmang.

Hi zan hin biekin puia sawnlut lo ni tah Ṭhalai member thar hai Ṭhalai Chairman in lawmlutna hun a hmang bawk. Corona leia ei harsatna hai khawm tlawm a zie a hung um pei ta le khuokhirna khau tak el a um hran ta naw leiin inkhawm hi sunzawm pei phawt dinga riruong a ni tah.

Ṭhalai thar hai hi Upa Ramhlunsang in ṭawngṭaipekna a nei a, inkhawm ṭinin an ni hai lawmlutna in thingpui le bei inhnik tak el biekin tuola kiltlang a nih.

Chun, hung tlung ding Zirtawp zan - Jan 22 khi 2021 kum a dinga Ṭhalai hming zieklut zan ding a riruong a ni a. Hi huna hin ṭhalai hai inkhawm nawk seng dingin ei in fiel a nih.