TPKTP kum inkhawmpui vawi 65-na hril neu neu

Tuithaphai Presbytery Kristien Thalai Pawl kum inkhawmpui a vawi 65-na (kum 2025) chu Changer ni 23-26 sung khan Roberts Jubilee Chapel ah tluong taka hmang zo a lo ni tah. Ningani zan mipui inkhawm tan a nia, Zirtawpni sun po ro rel a nia, Zirtawpni zana inthawk a dang po Pathienni zan chenin inruolsiekna le mipui inkhawmin a zui. Pathien thu hriltu un tak tak hai ei sie hnuoi tumna ni loin KTP inkhawmpuia hin Thalai member la naupang tak tak. Pathien ram invawitu haiin Pathien thu tak mata an hril hin Thalai hai ngainuom a tling hle a nih.

Inkhawmpui ding le inzawm hin inbuotsaina hi a hmalawk thlakhat deuthaw vel a baka hmalak tan a nia, chu ruol ruol chun hla inchukin a zui bawk a nih. Hall bawl a ni chie nawa chu biekin sak le thlang tiengah vaithlam a ni leiin sin thaw ding a mawitawk a um ve zing a. Hotuhaiin thiem taka thein, hlapawl a thang hai hla inchukin hlapawl a thang lo po sin thawna tieng le Pavalai hai thangin hall bawk hi thaw hlak a nih.

Thlazing thlain Thalai inkhelna le insukhlimna fepui a nia, Thlaram ah Beiruol fepui nawk a nia chu zo chun hnatlang le hlapawl inchuk chawl loa sunzawm nawk a ni leiin a sawl pawl hai chu nasatakin an sawl a. Amiruokchu, thalai hi a sawl le a hrat hai zara fe ve pei a ni leiin inrimna ra hi a thlawn ngai naw a nih.

Hnatlang sung hin unau Sielmat EFCI KTP kohran hai hall bawl sin thawnaah thahnem tak an hung inthawka, inhawi ti takin sin thaw tlang a nih. Sielmat EFCI KTP hai tlawmngaina entawn tlak tak a nia, lawm a um hle a nih.

Inkhawmpui dinga inbuotsainaa hin a bebawm a tam khawp el a, hall bawl le hlapawl inchuk a zo el thei a lo ni ngawt nawa. A sawl hai dawn ding thingpui inhnik tak taka inlum hlak, dawnna no le a bel hai fai taka sawp hlak thalai member inpezo tak el hai khawm ei innghil nawh. Inbuotsaina chu hril lo, KTP inkhawmpui mi a za tel le a santel dawn ding thingpui inhnik tak el hnesaw taka inlumtu thalai member hai an theina zawna chu insit an um naw hle.

Chubaka chun, tuolsung kohran local hmalaknaa ruoi buotsaia um fak ding inhnik tak tak el ni thum sung zet el buoipui tuhai khawm kha an thilthaw kha a temnem naw hle a nih. 

Inkhawmpui ei hmang sung po poa thu tha le a sie dittawka dawngtu InFo hai inpak an um hle. Inkhawmpuia thangve thei lo KTP member thai en thei dingin inkhawm tum kuo zet a rengin Live in an mi buotsai pek thei kha lawm a um hle. Live entu hi mi tam dungzuia thaw ding nisien chu thaw kher a ni dal thei, amiruokchu, KTP member thang chak em em thang ve remchang lo hai lo en thei ding le a khawhnunga en ding um zing dinga internet ah ei hniek ei maksan kha a thain lawm a um a nih.

Hril seng nawng ei tih, Ushering le Parking hai khawm an mawphurna an thaw tha hle. KTP member hai kha an sawl hle ding a nih. A then chu an birthday a, a then chu an khuo a sawt a, KTP a ni tlat leiin ei lawm seng a nih.

Hlapawlpuiah lawmman a pahnina ei lak kha a ropui tak zet, kum thara chu hlapawlpui inruolsiekna um naw ding a nia. Group Song ah lawmman la ngei thei dingin rawl lo tuoinam tan nghal ding chi a nih.

An hawia, a hlim um a, a sawl um bawk, anachu, ngai khawm a um a nih! TPKTP Kum inkhawmpui a vawi 66-na ah hring le damin thang thei nawk seng dingin KTP member hai ei inditsak hle a nih. Chu hma po chun ei hmadawm ah ringum takin thaw seng ei tiu aw. Krista le a kohran ta dingin.