KTP Project Exam (Crash Course) tan

Thalai member hai thlarau rama chau ni loa, khawvel khawsakna le inruolsiekna kawnga member hai inthangpuina ni fawm malama inchuklai le exam pe tum hai ta dinga buotsai KTP Project Exam chu Thawtanni (Thlaphal 17) zan khan tan a lo ni nawk taa. Thawtanni - Zirtawpni zan a hai class lak phawt a nih.

Hi huna hin EFCI KTP Chairman le Secretary hai khawm fiel an ni angin an thangve a, KTP Committee member le class a thang ding hai an thang bawk. Upa Lalrothlangin Pathien kuoma tawngtaina hmangin - SSC CPO Exam 2025 thlur bikin Project Exam crash course chu hawng a nih.

Ropui takin mi hai thaw angin thaw thei naw inla khawm, ei phak tawkah, mi hai ban phakin, a thang nuom po thang theia buotsai a ni hi lawm a um a. Hi neka ditum lem le thalem khawma hi project hi a la hung inthang pei ei nuomin ei beisei a nih.

Project exam Crash Course a hin mi 10 neka tam an inzieklut taa, kohran bik um loa thaw niin a thang ding an la um meka, a thang nuom hai ta dingin kawt hawng zing a ni bawk. KTP member hai, Lal rama rawng ei bawlna khawma a pawimaw lai zingin khawvel khawsakna ngaituona khawm a pawimaw bawk, takinning takin, hlawtling ngam dingin a thang hai po po ei ditsak.

Chun, lawmman khawm beisei lo zirtirna sin thawtuhai khawm ei tawngtaina ah hrietfuk tum bawk ei tiu.