Christmas Season Kick Off 2024
Tuolsung thalai pawl ta dinga hun pawimaw tak el Christmas Season Kick Off 2024 chu vawizan khan Fellowship Hall ah tluong taka hmang a nih. Indona rama um ei ni leiin puithu taka puotieng a hmang a, a risie zawnga thaw a remchang naw leiin insung ah tawifel taka hmangzo a nih.
Christmas Season 2024 hi Rev. Rambuotsai Tusing in Pathien thu tawi hrilin candle sit varin a hawng a. KTP Vice Chairman Tv. Paul Nathanin Christmas Season Kick Off hmang a ni hlak dan le hmang a nina san hrilin tukum sunga kohran member thina tuok hai sunna hunser hmang a ni zui nghal. Nk. Rosy Zonunmawia inthawk "What Christmas means to me" Thusam tawi ngaithlak a nih.
Kick Off thawlawm Rev. Joe Sanghmingthangin an hlan a. Kick Off thawlawm hi Krismas tawm ah KTP in kan ding tul le awm a ti hai Krismas thilpek inhlanna dinga hmang hlak a nih.
Krismas le inzawm Pathien thucha tawi Rev. Dr. V. Lalnghakthang a inthawk ngaithlak a ni a. Nk. Immanuel Zarzokim le Nk. Rebecca Lallawmkim haia inthawk Krismas hla mawi tak tak ngaithlak an ni a. Upa Lalrothlang in tawngtaina in hun a khar. Hunser hmangzo a ni hin thingpui le bei kiltlang a nih.
Hun hmangna hi InFo in Thlalak le Video coverage an thaw a, suksuok thei a ni hunah KTP YouTube Channel a insuo ning a tih.
Christmas Season Kick Off hi Covid hripui an leng a inthawk mumal le duthusama hmang thei a ni ta naw a, hun tawng mekin a zir naw leiin insungah a ri dam zawnga hmang le inser a ni hlak. Program ringawt ni loin Event pawimaw pakhat a ni leiin, hi hun hi KTP Committee chun pawimawa a ruot leiin hmang thei dan danin remchang ngaituoin hripui inleng le indo lai khawma Pathien zarin hmang thei peiin ei la um leiin Pathien kuomah lawmthu ei hril a nih.
No comments