Thil Ṭha Chanchin Lawmum Intluntuhai Ke Chu A Va Mawi De!

“THIL ṬHA CHANCHIN LAWMUM INTLUNTUHAI KE CHU A VA MAWI DE!” (Rom 10:16)

- Rev. H.P Runremthang

Tuipui râl ram hlataka inthawka Kâilâm râwl khawkrawk kara ramsa ang chaua an mi lo ngai hlak Tlângmihai kuoma chanchinṭha hril dinga Lalpa mi ruot W.R.Roberts (Sâp Tlangval) in Chanchin ṭha a hung intlunna champha (February 5) ei hung tlung a, ka lungril mi them bêk bêktu Pathien thu chu “Thil ṭha chainchin lâwmum intluntuhai ke chu a va mawi de!” ti thu hi a nih.

Thingtlângah football tournament ei nei pha, tlangvalhaiin GOAL an thun chara thlirtuhai khêk râwl chu “A ke a mawi” ti hi a nih. Chuong ang bawk chun, Manipur Simthlang, mi lu la hnamhai laia chanchin ṭha GOAL hung thuntuhai ke hi ‘a mawi’ ka ti bêk bêk el a nih. Mihlimhai thuziek ang deuin hang ziek lang:

Pu Tlangvaâl (Robert) a ke chu a va mawi de! India Hmarsak tlângmihai laia Chanchin ṭha hril dinga Pathien kona chu dawnin, Dr. Peter Fraserhai nupa, Aizawl pan dinga insiem chu a va bêl a. Dr. Fraser a nuhmei chun, “Robert, keini i mi hung zui ve ringawt chu, châwmtu ding khawm nei lo che a” tiin ân dawn a, W.R. Roberts chun, “A mi tirtu bawk khan mi châwm el naw ni'm” tiin a dawn a nih. Iengleia ei rama missionary fe suok ding ei tlâwm ta bêk bêk am a na ei ti chun, a mi tirtu en loin, a mi châwmtu ding ei buoipui hmasa a; a mi tirtu en loin ei fena ding ngawt ei en hmasa hlak lei a nih.

Abrahamin Pathien a ring a, a fena ding en loin, a kotu chu a en lem a, a fena ding tieng khawm hre loin a fê a nih (Heb.11:8). Chu chu a nih Missionary lungril ding chu.

Aizawl an hung tlunga Dispensary-ah damdawi zawrna sin a thaw a. A damdawi sem khawm chu Rawthei-ah a thuna, a bûra chun Pathien thu a ziek pei a nih an ti chu!

Tulaia damdawi zawrhai hin ieng angin am chanchin ṭha sukdarna ding hin ṭhang in lo lâk ve a? Inrimtak le pase taka sin a thaw laiin a umna rama inthawkin pawisa pound nga a dawng hlau el a. Chu khawm chu ama Pocket money-a dinga hmang loin Chanchin ṭha Johan bu mal inchâwkna dingin a hmang vawng a nih. Piengthar inti si, mani sum hmu hmasak sak Netpack thunna ding le Kuva man dinga hmang pawlhai lo inngaituong ei tiu. Chu chanchin ṭha Johan bu mal chu Senvon lal Kamkholun hung inthawnin; vawisun hin Chanchin ṭha ei hmu pha a. Kâilâm râwl cherek kâr a ramsa ang ela umhai kha ‘Van khuo-le-tuiah zieklûtin ei um ve a, Angel ruol hai leh tuol khatin ei lêng tlâng an ta hi! Sâp tlangval mi hung tirpektu Lalpa chau ropui raw se.

Vawisûna sâpram pawisa hmutuhai po po le, building ropui tak tak bâwltuhai hin ei pawisa hi ieng thil am ei hmang râwn tak a?

Senvon lal Kamkholunin “Pu, nang ngei hung la, i lekhabu mi hung inthawn hi mi hung hrilfie pêk rawh” tiin a ngên a. Senvon lalin a kona dawn ding ân siem lai chun Aizawla sawrkâr sin thawtu ṭhenkhatin Robert chu fe lo dingin an thlêm a: “Mi lu la hnam (head hunter) an nih a, i fe vai chun i lu an lo tan ding a nih” tiin. Chuphingleh Robert chun, “Nang ngei hung la, chanchin ṭha mi hung hril rawh ti tuhai hi an mi ngênna anga Chanchin ṭha hi ka hril hman phawt leh, nuom leh ka lu chu tan ta raw hai se” a ti a nih! A va ropui lâwm lâwm de aw. Paula ang deu khan ‘thlêm ruol’ nia an hriet naw leiin an inthla suok tah a nih.

Ei chanchin ṭha hmu ṭan dân hi thlir nawn rawp ei tiu. Missionary hmasatak Isu Krista khawm a hringna chân ṭhakin a hung inpêk a, eini rawi missionary khawm thi le hring inkâra hung a nih. Chuonglai zinga mi ṭhenkhatin sâp tlangval chu ‘Ram enthlatu’ ang chaua ei lo hril hi chu inzak a um taluo deu a nih. Eini rawi hi chu ‘a Missionary’ hi buoipui loin ‘a Day’ ku hi ei buoipui lem khawm a hawi an tah!

R. Dala ke chu a va mawi de! Missionary hai hi an fena hmun peiah a ram mihai pakhat/pahni bêk kut le ke ding an pawimaw a. Mosie kut le kehai khawm Hur le Aron an ni kha (Ex.17:12). Chuong ang bawkin Sâp Tlangval khawm khan rawngbâwlna dinga kut le ke ding (Ṭawng inlettu ding) a ma maw êm êm a. Chuong hun laitaka sawrkar sin thaw R.Dala chu a sina inthawkin ân bân a,Robert a rawngbâwlna chu a hung thlawp tah a nih. Halleluiah! Chanchin ṭha intluntuhai ke chu a va mawi de!

Hi article ziektu ngei khawm hi ama hun lai chun an vênga sawrkar sin thaw ve ngat a nih a; nunghak hmaa khawm a hlu ve fu tho kha a na. Khang hun (1910) lai vêla sawrkar sin thaw hlut lem dân ding chu ngaituong ei tiu. Chu chu mâksanin Krista ân vâkvâipui a ni chu. Iengtizie a tulaia sawrkar sin thawhai hin Missionary sin hi ‘a hui phâi’ (illiterate people) hai chan ding ni âwm taka ei ngai el am an tah a? Missionary dingin Daktawr khawm suok inla, Nurse hai khawm suok inla nuom a va um ta de!

Thina thim hnuoia inṭhunghai khun lekha thiem lo hmêl chau ni loin, sawrkar officer hmêl lo hmu khawm an nuom an tah. (“I Krista siem puitling kâr an lo nghâkhla, thim hnuoia nat tinrenga inrûm han” – Rev. Thangngûr) Ei Chanchinbu neisun ve (Hmasawnna Thar) a khawm hin miretheihai officer kaisâng thu chau ni loin, Officer hai Missionary fe thu khawm hi hriet ding um ve ta sien nuom a vei um lâwm lâwm de aw! Nehemiah ang khan Pathien ram sin hi “Sin ropuitakah” ngai inla; sawtnawtea tlu hâwp vawng ding sawrkara sin thaw nêkin, Lal ram se ta lo ding sawrkarna sin hi a hlu lem a, a ropui lem bawk a nih ti hi hre thar mawl ei tiu khai!

Thangkai le Lungpau hai ke chu a va mawi de! R. Dala kha Mizorama Robert a ruol hmasa a ni a; Thangkai le Lungpau hai ruok chu Manipur-a Robert a rawngbawlna thlawptu hmasatakhai an nih. Anni hi Kristiena an inpêk hmâ daia Robert a hnungzuituhai an nih. An fe peina hmunah (New Vervek khaw tlung hma charin) Kristiena dingin an hming an pêk a nih. Chuleiin, Manipur Simthlanga Kristien hmasatakhai an lo ni tah. Chanchin ṭha intluntuhai ke chu a va mawi lâwm lâwm de!

Mihai chu sandamna an chang hma khawmin Krista hminga tuor huomin rawng an bâwl a; eini rawi chu vawi tamtak ‘sandamna ka chang’ ei ti hnung khawm hin Krista hnung zui tumna reng reng nei lo ei la tam a nih. I la piengthar naw a ni khawmin khawvêl mi lien zui nêkin Isu hnung zui phawt rawh; lampuiah piengthar êm êm i tih.

Savawma, Vanzika le Thangchhingpuia hai ke chu a va mawi de! Annihai hi Sâp Tlangvâlin a mi fesan hnunga, a ram mi (Mizoram mi) ngêi rawngbâwl dinga hung (Native Worker) hai chu an nih. Sâp Tlangvalin a fesan hnung chun a rawngbâwlna sunzawmtu ding mihriem, mi tlâwmngai an zawng a; hieng mihai hi an inpêk a nih. Pâikâwng le meu inthawk suokin, hmêl hriet lo ramah, lampui khawm hre bawk loin chanchin ṭha an invâkvaipui a; Tuivai vadung lienin dang sien la khawm kir an tum chuong nawh. Tuivai râl an kai a, Manipur an hang lût zet chun an lâwm taluo a, “Aw Pathien nangma chanchin ṭha zarah, Lawmthu kan hril che” ti hla hi phur pumin vapangah an la sak a nih an ti chu! Chanchin ṭha intluntuhai ke chu a va mawi lâwm lâwm de!

Senvon an tlung chun tlung in ding mumal khawm an nei naw leiin Kâwnzâr lai Rawbawk (Inte) an bâwl a; mani intumin chanchin ṭha an lo invakvaipui a nih! “Tu tangkahai, rangkachakhai khawm kan hnar ngai naw kha. Hi kut ngei hin kei le ka ruolhai pawimâw chu a them suok hlak ti in hriet. Thil ka thaw taphawt ka thaw hmu hlak cheu a. Sininrim pum le Lalpa Isu thu hrezing pumin mi hrâtnawhai in ṭhangpui hlak ding a nih” (Thil.20:33-35) tia tirko hmasahai tuorna le an sinrimna chu annihai hin an hung sunzawm pei a nih.

Naran Singh a ke chu a va mawi de! Ama hi Meitei a nih a, Native Worker (Savawma, Vanzika le Thangchhingpuia hai Tuivai vadunga lo la kaitu a nih. Khang hun lai khan Tuivai vadung a lien bêk bêk a, kai thei loin sawttak an nghâk a. Iemani chen hnunga chun Naran Singh hi an hang hmu a, an kuta hûiin an ko a; tui lien sen zuoi zuoi lai chun mani hringna ngainêp khawpin a lo va lâkkai a nih.

Chanchin ṭha intluntuhai ke chu a va mawi lâwm lâwm de!

Ama um naw sien chu tuhin iem chang ei ta. Hieng a ni lei hin Manipur Sim thlanga Chanchin ṭha dawngtuhai hin ei unau Meiteihai chungah mawphurna lientak, dehâwn theilo ei nei a nih ti hi hre tlatin; vawisûna inthawk hin hma la zuol sau ei tiu.

Haman-in Mordekai khai hlum tuma plan a siem zân chun lal a in thei nawh a. Lekhabu a zuk keu chun kawtkhar vengtu Mordekai a thil thaw ṭhat chu hmu suok a nih a; ropui taka lalṭhungpha inhluotir niin, a khai hlum tumtu Haman chu an khai hlum lem tah a! (Es.6:1, 2) Chuong ang bawk chun Mr. Naran Singh hi mi naran, Ruo sât mei mei ni sien khawm, zan khat chu Lalpa in thei naw zân la tuok vêng a ta, a thil thaw ṭhat hi la hre ve zing a tih.

Chuong ang peiin, unau dittakhai, Chanchin ṭha hril darna kawnga hin mihai angin thaw tam thei naw la khawm, i theina hmunah theitawpa i lo ṭhang a ni phawt chun Lalpa Pathienin chawimawi hun la nei ngei ngei a ti che. “Mihriem inpâk naw lei che hin Lalpa’n an pâk naw che ring naw”.

LALPA'N A THU MALSAWM RAW SE. AMEN