Sielmat ICI KṬP in Diamond Jubilee lawm

Mîmtukthla 28-29, 2022 khan Sielmat ICI KṬP chun indin a nia inthawk a kum 60 tlingna - Diamond Jubilee lawmna hun Roberts Jubilee Chapel tuol, Sielmat ah an hmang. Pastor Hranghminglien Varte, Tuisuolien; Evan Sema Faihriem, Rongtheang, Dima Hasao; Rev. Lalneikhup Hmar, Secretary Ministries, ICI le Carey L. Inbuon, Lecturer, Sielmat Bible College haiin Pathien thu hrilna hun an hmang a. “I ringum ropui zie” (Lamentations 3:22-23) ti thupuia hmangin Diamond Jubilee hi lawm a nih.

Tarik 29, 2022 a nipui ni tak hin Rev. J. Thanglur, Secretary, Missions ICI in Diamond Jubilee lung a hawng a. Rev. Dr. JL Songate, Local Chairman, Sielmat in Diamond Jubilee Souvenir a tlangzar a. Sielmat ICI Local Church Committee, Sielmat EFCI KṬP, Sielmat ICI Nuhmei Pawl, Sielmat ICI Pavanglai Department, Sielmat ICI NSSU, Tuiṭhaphai Presbytery KṬP haiin a hmun ah chibai bukna thu le thilpek an inhlan a.

Khawmawi ICI KṬP, Saikawt North ICI KṬP haiin hun hmangin Diamond Jubilee lawmpuina thilpek an inhlan a. An ni baka hin hun hmang loa lawmpuina pe ve Thingchom ICI KṬP, Lamka ICI KṬP, Rengkai ICI KṬP le Imphal ICI Mission Compound hai an ṭhang bawk.

2013 khan Sielmat ICI KṬP hin Golden Jubilee a lo lawm ta a, hi le inzawm hin Golden Jubilee le Diamond Jubilee inkara rawngbawlna puitling a suokdawk ṭhalai member mi 10 - Rev. Dr. James R. Ruolngul, Academic Dean, SBC; Rev. Alan L. Ṭhiek, Registrar, SBC; Pastor Gospel Darsiemlien, Muallian, Meghalaya; Pastor Hranghminglien, Tuisuolien; Pastor Nahum Zahuoplien Zate, Hmarkhawlien; Pro Pastor H.D. Ramtharlawm, Leisen; Pro Pastor Samuel Lalhuopzau Khawbung, Langol; Evan Lalrosang Buongpui, Jamtailbari, Kailashahar, Unakoti, Tripura; Evan Sema Faihriem, Rongtheang, Dima Hasao le Evan Sophia Lalṭhuoitling Sungte, 3km, Umrangsuo hai chawimawina thilpek an inhlan a.

Golden Jubilee le Diamond Jubilee hla hai phuoktu Pu Laltleilien Amo kuomah chawimawina an inhlan bawk.

Diamond Jubilee lawmna hun hmang a ni sung hin Rebecca Lallawmkim, Winner Tuiṭhaphai Presbytery KṬP 2022 solo competition, Katie Ṭaite, B Melody, Winner Diamond Jubilee Malzai inruolsiekna le ṭhalai sunga hlasak thiem dang dang haiin inpakna hla sakna hun an hmang tawl.

Diamond Jubilee a nipui ni tak tarik 29 hin bawng thatin, Jubilee hmanga fekhawm mipui haiin lawmna ruoi an kiltlang thu Diamond Jubilee Documenting Team haiin an hril. (Newspaper a tiem nuom hai ta dingin Hmasawnna Thar Mimtukthla 31, 2022 tûk a insuo a nih)