ICI Sielmat KṬP Diamond Jubilee SPELLING BEE 2022 Inhriettirna

Hung tlung ding June 10, 2022 (Zirtawpni) dâr 7:00 PM hin ICI Sielmat Fellowship Hall-ah KṬP in kum 60 a tlingna Diamond Jubilee lâwmna le inzawmin, Hmar hawrawp lam dik insiek Spelling Bee ei huoihawt ding a na. Group tin anthawk a ṭhang ding hung inthlangsuok dingin le ṭhalaihai, a tam thei angin, hi programme hi hung uop dingin ei infiel.

Hi le inzawm hin inhriettirna a hnuoia ang hin ei hung siem:

1. Group tin a’nthawk mi 10 ṭhang thei an tih.

2. Inruolsieknaa ṭhang dinghai chun, an group leader fethlengin, June 9, 2022 khawvar hun sûng ngêi, a hnuoia hming zieklang kuoma hin pêklût ning a tih.

3. Thumal hai hi Hmar hawrawp (A, AW, B) lam ngêia hril ding a nih.

4. Thumal hril (spelling) hun sûng hi 30 seconds sûng ning a ta, hun entu (time-keeper) sie ning a tih.

5. Inruolsieknaa thumal hai hi a tam lem Holy Bible (BSI Golden Jubilee edition)-a mi hmang ning a ta, Proper Noun (hming bîk neihai) ṭhang naw nih.

6. Thumal hi a umzie (definition) le a hmangna (usage/sentence) indawn thei ning a tih.

7. June 10, 2022 zân dâr 7:00 PM hin a vawikhatna, ROUND I (Qualifying Round) nei ning a tih.

8. ROUND dang hai neina hun ding chu inhriettirna la hung siem nawk ning a tih.

9. FINAL ROUND zo hunah a thiem tak a’nthawk a pathumna chen lawmman siem ning a ta, sumfai bâkah chawimawina thuziek (certificate) pêk suok ning a tih. Hi bâka hin KṬP group points pêk ni bawk an tih.

10. Programme kâr lakah malzai ngaithlâkna um a tih.

Programme inhawi le hlawtling taka hmang a ni theina dingin ei ṭawngṭainaah lo hrie’ng ei tiu.

JOSHUA L. AMO

Secretary, Organising Committee

KṬP Diamond Jubilee SPELLING BEE 2022