Kohranpui inkhawm thla 7 hnungin sunzawm; Pathienni inkhawm Group A le B a ințhe

Khawvel a Coronavirus inleng, India a hung lut a, ram pum huopa March 2020 a inthawk inkhawm le puipung hrim hrim hai khap a ni hnung, inkhawm chawlsan ve vang vang niin kohranpui inkhawm pangngai chu Nilai zan - Oct 7, 2020 khan țan a lo ni nawk tah.

Inkhawmna ding le inzawm hin sawrkarin a țul le pawimaw a ti țhenkhat - kutsawpna, țhungna inbichil nawna dinga kar awl huntawk, hmai tuomna hai le mihriem temperature hrietna hai riruong le sie ve a ni a. Hmai tuomna hai khawm member haiin an hmang a, a hmang lo khawm an um tho.

Hun sawttak a liem hnunga inkhawm nawkna a ni leiin local hotuhaiin, a lawmnain inkhawm hai po po thingpui le bei in an hrai bawk a nih.

Liemtah September 27 khan September Beiruol kharna in , a bik lieu in biekin tuol ah inkhawm huoihawt a lo ni tah. Amiruokchu, tuta mi hi kohran inkhawm pangngai, hunser bik ni loa țan nawkna a ni a.

Hun danga po a pangngai a inkhawm ning a ta, Pathienni haia hin buk hni - Group A le B a ințhe pei ning a tih. Group A a hin Upper Canaan, Lower Canaan le Vengthlang hai ning an ta. Group B a hin Mission Compound, Lalveng le Venglai hai po ni ve thung an tih.

Pathienni tuk le zan huna group inkhawm hun pei ding chu Pulpit Committee mawphurna a sie a ni a. Inkhawm hun chu Pathienni zingkar 10: 30; Pathienni zan 6:00 le zan dang hai po chu 6: 30 an ni ding a nih.