Thla 6 hnunga a vawikhatna dingin inkhawm; Biekin la lut lo

Coronavirus hri inleng leia India sawrkar thlungpuiin ram pum huop lockdown a puong leia March 2020 a inthawk pungkhawmna thil hai hrim hrim phal an ni ta naw le inzawma inkhawm khawm thla 6 neka tam zet chawl a ni ta hnungin vawisun khan a vawikhatna dingin inkhawm huoihawt nawk a lo ni tah.

Inkhawm hi huoihawt nisienkhawm, biekin hawng a la ni naw a, Roberts' Jubilee Chapel tuolzawla thingbuk hnuoia hai inṭhungin inkhawmna hun hi hmang a nih. Kohran member ṭhahnem tak fekhawm niin hmai tuomna hmang le fimkhur thei ang taka pungkhawm a nih.

Hi hun hi September Beiruol kharna hunser bika hmang a ni a, Rev. Michael Zote in Pathien thuhrilna hun a hmang a. Inkhawm ṭinin Pathien ṭhuoina zara hun thar hmu theia ei um hai lawmnain thingpui le bei kohran haiin an kiltlang a.

Hun sawttak hnunga inkhawm nawkna a ni leiin kohran member hai lungril a tawk tawl hle a. Nisienlakhawm, local inkhawm hi hawngna ding hun tak chu puong a la ni hri naw a. Thla thar tieng la nghak hri nawk phawt a nih.