Pass Lawm - Literary Night hmang

Thlado 14, 2024 zan dar 7 khan Fellowship Hall ah Pass Lawm - Literary Night hmang a nih.

Kum 2024 a pawl 10 le 12, Manipur le Meghalaya Board Exam a hlawtlingna chang hai ta dingin Rev. Joe Sanghmingthang in ṭawngṭai pekna hun a hmang a. Tv. Anthony Buongpui, Chairman in infuina thucha, lekha inchuk khawm ngai pawimaw ding a ni lai zingin mani line hriet a kut sinthaw khawma fak zawnga khawsak rel theina ding lamdawk thei a ni thu, takinningna le ringumna, zaidawtheina a pawimaw thu a hril.

Pass hai aiaw in Tv. Lalropui Biete @ Rare in lawmthu hrilna hun hmangin, thu mawikhai le ngainuom um tak el a hril bawk.

Hun hmasa hmangzo a niin Literary Night hmang a ni a. Assistant Secretary in literary a pawimaw zie tawite hrilin, “lekhathawn mawi” ziek hai chu tiemsuokna hun hmang a nih.

Group tinin lekhathawn pakhat seng an hung buotsaia, chuong hai chu group aiawtu haiin fekhawm hai hmaah an tiemsuok a. Thu mawi le inril, ngainuom um tak tak el an ni a. Group hai hmalakna le an ngaituona seng po po lawm a um hle.

Endiktu pahni siem a ni a, creativity, tiem thiem dan hai en niin a pakhatna Alpha (Salṭha ram suok le SISIL), Logos, Agape le Omega haiin an zui a nih.

Literary Night hi ei vawikhat huoihawtna a nia, hunser dang le keikawp a ni bawk. Nisienkhawm, ṭhalai hai an phurin inhawi an ti tlang a, hieng ang hun hi hmang nawk ni ngei sien ti chu nuom dan tlangpui nisien an lang.

Literary Night hmangna a lekhahawn mawi tiemlang a um hai hi video le audio record Documenting Team haiin an buotsai a, Ṭhalai YouTube Channel a hmu vat beisei a nih.