Tuiṭhaphai Ṭhalai inkhawmpui Nov 14 ah

October 16, 2020 a Independent Church of India, Tuiṭhaphai Presbytery (Standing Committee OB) in Circular ansuo dungzuiin tukum 2020 Tuiṭhaphai Presbytery Kristien Ṭhalai Pawl (TPKṬP)  Inkhawmpui chu hung tlung ding November 14, 2020 sun huna po rorelna huna hmang a ni ding thu a suklang. Inkhawmpui hi Sielmat khuoa innghat ding a nih.

Hi dungzui hin TPKṬP chun October 19 khan thusuok a siem a, Covid-19 leia harsatna chu kiem tieng a la pan thei naw zing le zuol tieng a pan pei leia an lang leiin Solo le Group Song inruolsiekna nei dinga ti chu cancel a ni ta thu thusuok chun a hril a. Hri leng leiin Hlapawlpui chu nei lo ding renga thutlukna siem ta sa a lo nih.

Group Song le Solo hi nei ding ti a ni hnunga nei ta lo dinga rel a ni le inzawmin TPKṬP chun Unit inbuotsaina lo fepui mek ta hai kuoma hrietthiemna a ngen nghal bawk.

Chubaka chun, Diamond Jubilee ding le inzawma KṬP Sports nei dinga rel ta sa khawm chu boruok a lan thieng thei naw leiin ṭhul hri phawt a ni ta bawk a. Rorelna hun ṭha taka hmang a ni theina dingin ṭawngṭaina a lo hrie tawl dingin TPKṬP Secretary in thusuok a siemna a chun a hrilsa a nih.

Inkhawmpui inhmang dan ding chipchier taka insuo a la ni hri nawh.